Chandni raat bari der ke baad ayi

Chandni raat bari der ke baad ayi,
Yeh mulaqat bari der ke baad ayi,

Aaj aye hain woh milne ko bari der ke bad,
Aaj ki raat bari der ke baad ayi..

Umar bhar ka maan toota, aur kya

Umar bhar ka maan toota, aur kya,
Morr aya, sath choota, aur kya,

Kon sach kehta hai, sach sunta hai kon,
Main bhi jhoota, tu bhi jhoota, aur kya,

Jaan se jaana zaroori to nahin,
Aashiqui mein sar to phoota, aur kya,

Rote huye laal pathar ho gaye,
Rafta rafta rang choota, aur kya,

Reh gaya tha yaad ka rishta faqat,
Akhrish yeh pul bhi toota, aur kya,

Us ki ankhain bhi kabhi sach bolti’n,
Dil to tha jhooton sa jhoota, aur kya,

Ghair to they ghair apne aap ko,
Sab se barh kar hum ne loota, aur kya,

aao dekho to zara baagh-e-wafaa,
Ab koi gul hai na boota, aur kya,

Fitna samaani mein yaksaan hain Faraz,
Apna dil ho ya kahuta, aur kya..

Paani ki dushmani bhi viraasat mein paayi thi

Paani ki dushmani bhi viraasat mein paayi thi,
Ghar bhi samundron ke kinaarey banaye they..

Yeh chandni bhi jin ko choote huye darti hai

Yeh chandni bhi jin ko choote huye darti hai,
Duniya inhi phoolon ko pairon se masalti hai,

Shohrat ki bulandi bhi pal bhar ka tamasha hai,
Jiss daal pe bethe ho woh toot bhi sakti hai,

Lohaan mein chingaari jese koi rakh jaye,
Yu’n yaad teri shab bhar seene mein sulagti hai,

Ajata hai khud kheench kar dil seene se patrri per,
Jab raat ki sarhad se ik rail guzarti hai,

Aansu kabhi palkon per ta-dair nahin rukte,
Urr jate hain yeh panchi jab shaakh lachakti hai,

Khush rang parindon ke laut aaney ke din aye,
Bichrre huye milte hain jab baraf pighalti hai..

Pal mein hamare dekhte dekhte hanste baste logon ko

Pal mein hamare dekhte dekhte hanste baste logon ko,
Kese lag jaya karti hai, Kabhi na tootne wali chupp..

Unhe hum yaad ate hain fursat ke Lamhaat main

Unhe hum yaad ate hain fursat ke Lamhaat main,
Par yeh bhi sach hai, Unhain fursat nahi milti ..!

wo pehlay jaisi wehshaten, wo haal hi nahi raha

wo pehlay jaisi wehshaten, wo haal hi nahi raha,
ke ab to shauk-e-rahat-e- visaal hi nahi raha,

tamaam hasraten, har ek sawaal dafan kar chuke,
hamare paas ab koi sawaal hi nahi raha,

talaash-e-rizq mai ye shaam yun hi guzar gayi,
koi hai apna muntazir, khayal hi nahi raha,

in aate jaate roz – o – shab ki gardsihon ko dekh kar,
kisi ke hijar ka koi malaal hi nahi raha,

hamara kya bane ga, kuch na kuch to is par sochte,
magar kabhi humen ghum-e-maal hi nahi raha,

sanwaarta, nikhaarta mai kaise apne aap ko,
tumhare baad apna kuch khayal hi nahi raha,

zara si baat par dilon mai itna fark aa gaya,
ta’aluqaat ka to phir sawaal hi nahi raha

wo pehlay jaisi wehshaten, wo haal hi nahi raha,
ke ab to shauk-e-rahat-e- visaal hi nahi raha….!!!!

 

 

 

Ab koi yaar hai na baili hai

Ab koi yaar hai na baili hai,
Zindagi dard ki saheli hai,

Uthne joga nahin hai tere baad,
Dil ne takleef aesi jhaili hai,

Sham se is liye mohabbat hai,
Teri yadon ke sath kheli hai,

Muztarib kyon na hoon shab-e-hijran,
Dard ki gaud mein akeli hai,

Koi batlaye khawab ka mafhoom,
Raat hai, saamp hai, chambeli hai,

In lakeeron mein tu nahin to Wasi,
Kitni veeran yeh hatheli hai..

Gilley hain hazaron ke badle ho kyon tum

Gilley hain hazaron ke badle ho kyon tum,
Magar ab karain kyon gillaa ajnabi se,

Azal hai neendain ganwaaney ka silsila,
Yeh acha nahin silsila ajnabi se..

Jab bhi ik shaam yaad ati hai

Jab bhi ik shaam yaad ati hai,
Jese duniya theher si jati hai,

Ik taraf dil hain, Ik taraf duniya,
Aur yeh scene kayenaati hai,

Yu’n bhi hota hai sher, baaz aukat,
Jese bijli si koond jati hai,

Maut se ham’kalaam hone ke,
Zindagi raste dikhati hai,

Haar hoti hai aarzi, us ko,
Be-dili mustakil banati hai,

Haadsey aik pal nahin rukte
Zindagi hai ke chalti jati hai,

Us ke dam se hain ronaq’en sari,
Yeh jo dunya ki be-sabaati hai,

Baat koi samajh nahin ati,
Baat itni samajh mein ati hai..

Follow

Get every new post delivered to your Inbox.

%d bloggers like this: